मधेशी जनअधिकार फोरम तराईमा अग्रसर

तराईका कतिपय ठाउँमा अन्य तराईवादी पार्टीले पनि राम्रो प्रदर्शन गरेका छन्
।

संविधानसभा चुनावको घोषित नतिजाले मधेशी जनअधिकार फोरम तराइमा अपेक्षित सफलतातर्फ अग्रसर देखिएको छ । कतिपय ठाउँमा तराइ मधेश लोकतान्त्रिक पार्टी र सदभावना पार्टीले पनि राम्रो प्रदर्शन गरेका छन् । पूर्वको झापादेखि पश्चिमको बाँके सम्म उल्लेख्य संख्यामा फोरमका उम्मेदवारहरुले जितेका छन् । त्यसले गर्दा फोरम राष्ट्रिय दलको रुपमा स्थापित भएको छ । संगठनलाइ व्यवस्थित र चुनावी तालमेल समेत गर्न नसकेको तराईका दलहरुले अनपेक्षित रुपमा सफलता प्राप्त गरेको बताइन्छ ।

फरक धारणाहरु
तराईका दलहरुले पाएका सफलता बारे फरक फरक धारणाहरु व्यक्त गरिंदैछ । प्राध्यापक परमेश्वर कापडीले संविधानसभाबाट संघीयता सुनिश्चित हुने भएकोले तराइमा फोरम लगायतका दलहरुले सफलता पाएको बताएका छन् । तर अर्का प्राध्यापक विजय दत्तले नेपाली काँग्रेस र नेकपा एमाले जस्ता दलहरुले मधेशका जनताले चाहेको परिवर्तनलाइ आत्मसात गर्न नसक्नु नै तराइका दलहरुको सफलताको प्रमुख कारण भएको जनाएका छन् ।
काठमाण्डूबाट पराजित नेकपा एमाले महासचिव माधवकुमार नेपाल रौतहट जिल्लाको निर्वाचन क्षेत्र नम्बर छबाट पराजीत भएका छन् । उनलाई माओवादी उम्मेदवार देवेन्द्र पटेलले हराएका हुन् । रौतहट जिल्लाको निर्वाचन क्षेत्र नम्बर एकबाट प्रहरीको खोजि सूचीमा रहेका ववन सिंहले चुनाव जितेका छन् ।
मतगणना जारी रहँदा अहिलेसम्म स्वतन्त्र रुपमा चुनाव जित्ने उनी एकमात्र उम्मेदवार हुन् । वारेस मार्फत मनोनयन पत्र दाखिला गरेका सिंह काठमाण्डू बम काण्डका आरोपित हुन् ।