नृत्य हेर्दा आँखा फोरिएपछि

काठमाडौं- दरबारमार्गस्थित एक डान्स रेस्टुरेन्टमा नृत्य हेर्दै गरेका युवकको गएराति अज्ञात समूहले एउटा आँखै फोरिदिएको छ । जनकपुर नगरपालिका-३ घर भई बागबजार बस्दैआएका २९ वर्षीय अनिल थापालाई गएराति दरबारमार्गको डान्स रेस्टुरेन्टमा अज्ञात समूहले कुटपिट गरी बायाँ आँखा फोरिदिएको प्रहरीले जनाएको छ । तर प्रहरीले डान्स रेस्टुरेन्ट र आँखा फोर्ने व्यक्तिको नाम, थर भने गोप्य नै राखेको छ ।
त्यस्तै गएराति ठमेलस्थित टान्जिर रेस्टुरेन्टमा खान गएका बालाजुका युवकलाई लाप्चा मुखियालगायतका व्यक्तिले कुटपिट गरी घाइते तुल्याएका छन् । वनस्थली बस्ने २९ वर्षीय धीरज पौडेललाई उनीहरूले कुटपिट गरी घाइते तुल्याएको र पौडेलको वीर अस्पतालमा उपचार भइरहेको प्रहरीले जनाएको छ । त्यस्तै कामपा-२ लाजिम्पाटस्थित होटेल रेडिसनमा गैरीधारा बस्ने सुदर्शन बस्नेतलाई बालाजुका राजेन्द्र बोहरासहित चार जनाले कुटपिट गरी घाइते तुल्याएका छन् ।