गाउमा विवाह हुंदा स्कुल बिदा

रौतहट - गाउमा चेलीबेटीको विवाह भएमा यहाको एक विद्यालयले र्सार्वजनिक बिदा दिने गरेको छ । विद्यालय बन्द हुदा विद्यार्थीको पठन-पाठन प्रभावित हुदै आएको छ ।
सदरमुकाम गौर-१२ स्थित पुरेनवा टोलमा रहेको श्री प्राथमिक विद्यालय गाउमा विवाह हुदा अतिथि सत्कारका लागि विद्यालय प्रयोग गर्न दिदा बन्द हुने गरेको हो । विद्यालय बिदा हुने हुदा बालबालिकाको अध्ययनमा बाधा पुगेको एक स्थानीयबासीले बताए ।
विद्यालय बिदा हुदा पढाइमा बाधा पुगेको छ । 'सबैको पालामा जन्तीलाई बस्नका लागि त्यही विद्यालय चाहिन्छ कसरी विरोध गर्नु -' एक स्थानीयबासीले भने, 'अन्य बस्ने घर नभएकाले सबैका छोरीको विवाहमा विद्यालयमा नै दिउसो र राति राख्ने चलन छ ।' त्यसका लागि स्थानीयबासीले विवाह हुने दुइ-चार दिनअघि नै विद्यालय प्रशासनलाई जानकारी दिनुपर्छ ।
गाउमा हुने धार्मिक कार्यक्रममा अतिथि बनी आउनेलाई पनि विद्यालयका कक्षाकोठामा बासको प्रबन्ध मिलाइने गर्नाले विद्यालय बन्द हुने गरेको छ । उक्त विद्यालयलाई टोलबासीले केही वर्षेखि अतिथिको बसोबास र खानपिनको निम्ति प्रयोग गर्दै आएका छन् । विद्यालयका प्रध्यानाध्यापक अक्षय लाल यादवले गाउमा विवाह हुदा ठूलो संख्याका अतिथि बस्ने ठाउको अभावमा विद्यालयमा बस्न दिइने गरेको बताए । 'गाउमा व्यवहारिक पक्षलाई पनि हेर्नुपर्‍यो,' उनले भने, 'विवाह जस्तो काममा सबैको सल्लाहमा नै एक दिन विद्यालय बन्द गर्ने गरेका छौं ।'
गएको शुक्रबार पुरेनवाकी संगीताको विवाहमा आएका जन्तीको बसोबासका लागि विद्यालयमा र्सार्वजनिक बिदा दिइएको थियो । उनको विवाह खेस्रैया गाविसका एक युवकसग भएको थियो । विवाहको मौसममा एक महिनामा १० दिनसम्म विद्यालय बन्द हुने गरेको गुनासो विद्यार्थीको छ ।