एसएलसी भोलिदेखि

काठमाडौं - यस वर्षको एसएलसी परीक्षा भोलि सोमबार बिहान ८ बजेदेखि शुरू हुँदै छ ।
देशभरका ३ लाख ७८ हजार १ सय ३२ विद्यार्थी विद्यालय तहको अन्तिम परीक्षामा सामेल हुँदै छन् । नियमिततर्फ १ लाख ६८ हजार ३ सय ५३ छात्र र १ लाख ४५ हजार २ सय ६१ छात्रा परीक्षामा सहभागी हुने भएका छन् ।
त्यस्तै एक्जाम्टेडतर्फ २४ हजार २ सय ९५ छात्र र ३४ हजार १ सय ५६ छात्रा रहेको परीक्षा नियन्त्रण कार्यालय सानोठिमीले जनाएको छ । परीक्षा सञ्चालनको सम्पूर्ण तयारी पूरा भइसकेको परीक्षा नियन्त्रक हर्कप्रसाद श्रेष्ठले बताउनुभयो । यस वर्ष प्राइभेट नियमिततर्फ ५ हजार ७ सय ६ र एक्जाम्टेडतर्फ १ हजार ४ सय ८० विद्यार्थी रहेका छन् । परीक्षा सहज तरिकाले सञ्चालन गर्न देशभर १ हजार २ सय ९९ परीक्षाकेन्द्र कायम गरिएको छ । गत वर्षको तुलनामा यस वर्ष १ सय १३ केन्द्र वृद्धि गरिएको छ ।

सरकारले दूरशिक्षा माध्यमबाट देशभरका पाँच विद्यालयमा खुला माध्यमबाट अध्ययन गरेका १ सय १२ जना परीक्षार्थी यस वर्षको परीक्षामा सामेल भएका छन् । खुलामा छात्रतर्फ ३८ र छात्रातर्फ ७४ परीक्षार्थी एसएलसी परीक्षामा सामेल हुँदै छन् । यसै गरी काठमाडौं भ्याली स्कुलबाट अंग्रेजी माध्यमबाट पहिलो पटक दुई विदेशी विद्यार्थी परीक्षामा सहभागी हुँदै छन् ।